給老豆的書信
老豆我係羅嘉偉， 對唔住， 我趕唔切返黎見你最後一面， 我好開心我走左之後都有返黎搵我。 仲會安慰我。 呢篇野我用電腦打出黎既原因係因為我怕你睇唔明我寫咩， 你知我啲字有幾核特。
我記得第一晚你返黎，我地準備左野食比你， 你有返黎食。 第二次你返黎我訓左係你地房地下， 你過左黎摸我個頭。 第三次我都唔知係咪你黎， 但我叫你係有反應， 雖然反應有啲奇怪。 第四次就係你安慰我， 叫我唔好咁唔開心。
老豆， 我真係好掛住你， 最後一次同你講野係10月14 號， 係視像， 本身過多幾日就可以同你講電話， 講下啲無聊野， 講下英國天氣， 講下英國幾衰… 放心啦! 你唔係屋企個陣我都會每個星期都打電話返香港同丫媽同羅嘉欣傾下計。
而家諗返起，以前細個家讀書唔叻又唔乖，但你都係好錫我！我好記得有一次，羅嘉欣考試考得好，你帶佢去玩具反斗城買禮物，你驚我唔開心，就買左部Gameboy Color 比我，我仲好記得係透明紫黎，買完之後你個女嬲，問點解要買比我。
仲有一次又係細細個，行荃豐。我見到盒Moz卡，個陣好興，個個都玩。我見到以為入面有野，點知一拎上手係吉盒黎…我好順口講左句「唉！我想要好耐！」然後你就同我講，傻仔！要就出聲嘛，轉個頭就帶左我入荃豐買。仲有搖搖又係。行過我玩爛左就買個新比我。
係呀， 部電視我幫你搞好啦， 個個盒仔APP而家用得返， 你老婆而家可以係個電視到睇泰國戲同劇， 仲要唔洗開盒仔， 開電視就得。 另外你話好勁可以行Steam OS + Windows 個部機呢， 我都整返好， 不過我淨係裝左windows 入去， 冇裝SteamOS， 因為比你個女做後備電腦， 你個部HP 好似想壞咁。 部Samsung 電腦我就諗住比Mickey， 佢部蘋果電腦好多年啦， 好慢， 要換， 你部野岩哂佢用。 同埋你D hard disk 點搞， 放係到唔知有咩用， 而家咩都上cloud， 好小用到咁大儲存量既hard disk， 你話比我知你想點啦， 我幫你搞左佢。 同埋差啲唔記得， 你啲遊戲機同VR 眼鏡… 賣出去又唔值錢， 我拎返英國又唔知做咩…點搞。 你個堆CD 我叫左你個女放出去， 但唔好一次過咁放， 一定比人呃。
你咁多野係到， 扔又唔係， 唔扔又唔知點。 你都知佢地下年會搬去新屋架啦， 唔知放邊好。 有能力我一定會拎返哂英國，之後好似你咁， 得閒玩下， 搞下佢地， 可惜係冇。
對唔住呀老豆， 我呢世人冇咩野成就， 冇機會請你去玩， 同你周圍去， 我去左英國之後你仲更加擔心我， 擔心我搞唔掂， 同埋擔心我係個邊唔開心。 對唔住， 要你成日擔心我， 我之後會好好地努力做人， 去搵錢， 唔好比呀媽擔心我。 我諗你而家都知我係咩情況， 我會努力架啦! 對唔住， 希望你可以原諒我， 我呃左你咁耐!
同埋搵工個到， 你唔洗擔心我架啦， 我會努力去搵， 我唔會放棄而家份工， 我會一路做一路搵新工， 騎牛搵馬， 搵到一份學到野， 多啲錢既工， 咁就唔洗你同呀媽咁擔心我。
老豆， 我有好多野未做， 我好後悔。 我知你好想睇到你啲仔女結婚。 我同Mickey本身係諗住下年係英國結婚， 然後返香港同你地同埋Mickey 屋企人食餐飯。 我知你好想抱孫， 對唔住呀， 我又係未可以係你仲係到個陣比你抱到孫。
而家諗返起， 好多野我都好想做但未做到。 我好想攬下你同你講一聲我愛你， 雖然我知你一定打冷震同埋叫我唔好咁肉麻， 但我都好想做。 好想同你去飲多次茶同你去食你好鐘意食個間牛肚麵再去食雲呑麵。 好想再好似以前咁， 兩父子坐係同一個空間， 兩個人唔洗點出聲， 就已經好開心。
我11月19號走啦!返英國繼續我既生活， 不過返英國之前我會留係泰國一日， 你如果想既話可以跟埋我去。 上一次我地成家去泰國係今年4月既事啦， 我去泰國可以去返之前同你去過既地方， 帶埋你去食好食既野， 最緊要係同你去食冰。
老豆， 我知你好擔心我， 擔心我健康， 我返到英國會努力減肥， 最少做到一樣你想我做到既野比你睇。 我會努力架啦。 你唔好再擔心我啦! 你開心啲去玩! 人走左之後係點我唔知道， 如果仲係呢到既話， 你就開開心心去玩啦! 去你想去既地方， 見你想見既人! 到有一日我都走左， 我一定會黎搵你， 同你講我既故仔。 有孫既話我一定會帶佢黎見爺爺! 同埋得閒黎英國探下我同Mickey! 但如果係要投貽轉世既話， 你安心去啦， 唔好掛住我地啦! 你而經辛苦左一世， 係時候比自己休息下。
老豆! 爸爸! 羅一鳴! 再見啦! 我好開心可以做到你個仔， 我好自豪有你做我老豆， 好開心我有一個咁好咁錫我既爸爸! 我愛你! 我會好好地去做人， 唔好再擔心我啦， 去做自己鐘意做既野啦!我愛你！老豆！
最後最後， 老豆， 我會起個網站， 寫低我呢一世人發生過咩事， 而呢個站係為你而開， 比你知道我發生咩事! 就算你唔係我身邊， 你都可以知道我既事， 而我又可以分享下我既事比你聽! 個網站係https://www.alexl.uk 而家未準備好既， 係預12月呀。 我一整好你就可以睇啦!